Wasaaradda Beeraha iyo Waraabka Jubbaland ayaa ka bilowday Degmada Doolow barnaamij lagu taageerayo beeraleyda degmada, iyadoo ka caawinaysa adeegga makiinadaha lagu falo beeraha si loo yareeyo culeyska ka dhashay sare u kaca qiimaha shidaalka iyo kharashaadka wax-soo-saarka.
Agaasimaha Guud ee Wasaaradda Beeraha iyo Waraabka Jubbaland, Mudane Mohamed Mursal Hirsi, ayaa goob-joog ka ahaa howlaha falista beeraha, isagoo kormeeray sida ay shaqadu u socoto isla markaana dhiirrigelin u muujiyay beeraleyda ka faa’iideysanaysa barnaamijkan.
Wasaaraddu waxay qorsheysay in ka badan 500 oo beeraley ah laga taageero falista beerahooda inta lagu jiro xilli-beereedkan, si loo kordhiyo wax-soo-saarka beeraha loona xoojiyo amniga cuntada ee bulshada.
Barnaamijkan ayaa qeyb ka ah dadaallada Wasaaradda ee lagu horumarinayo wax-soo-saarka gudaha iyo taageeridda beeraleyda Jubbaland si ay ula tacaalaan caqabadaha ka jira dhinaca beeraha.
