William Samoei Ruto waxa uu caruurnimadiisii ku qaatay Tuulo ku taal gobolka Rift Vally halkaasoo qoyskiisa oo danyar ah ay daganaayeen, isagoo dhaqi jiray lo’da, islamarkaana qoyska ku caawin jiray beerashada galleyda iyo Kaabashka.
Balse Mudooyinkii danbe, Mr. Ruto, oo ahaa madaxweyne ku-xigeenka Kenya muddo toban sano ku dhow, ayaa ka soo toosa guri weyn oo aad u qurux badan oo ku yaalla caasimadda Kenya ee Nairobi, halkaas oo uu shirar ku qabto ka hor inta aanu duulin, sidii uu subaxdii dhowayd yeelay isaga oo saaran diyaarad helicopter ah oo la dhigay meel u dhow barkad daboolan.
Isniintii, madaxa guddiga doorashada ayaa ku dhawaaqay Mr. Ruto, oo 55 jir ah, inuu yahay madaxweynaha xiga ee Kenya, laakiin aqlabiyadda guddiga ayaa diiday inay saxiixaan tirinta codadka, sababo la xiriira hufnaan la’aan.
Sare u kaciisa siyaasadeed ayaa ku dhawaaday inuu soo afjarmo ka dib doorashooyinkii dhiiga badan ku daatay ee lagu tartamay 2007dii. Maxkamadda caalamiga ah ee dambiyada ayaa ku eedeysay dambiyo ka dhan ah bini’aadantinimada, iyadoo ku eedeysay inuu geystay rabshado ay ku dhinteen in ka badan 1,200 oo qof, 600,000 oo kalena ay ku barakaceen. Eedeymaha ayaa waxaa ka mid ahaa dil, cadaadis iyo in dadka lagu khasbo in ay guryahooda ka baxaan.
Laakiin kiiskii isaga ka dhanka ahaa ayaa burburay 2016-kii, iyadoo xukuumaddii uu ugu adeegayay booska madaxweyne ku xigeenka ay caqabad ku noqotay ururinta cadaymaha arrimo la xiriira wax ay maxkamaddu ugu yeertay Faragelin dhanka Marqaatiyaasha iyo mid siyaasadeed.
Mr. Ruto waxa uu ku dhashay tuulada Sambut, oo qiyaastii 12 mayl waqooyi-galbeed kaga beegan magaalada Eldoret. Wuxuu dhaqi jiray ido iyo lo’, wuxuu la ugaadhsan jiray bakaylaha asxaabtiisa wuxuuna dhigan jiray dugsiga isagoo caga-la’aan ah.
Markii uu soo koray, Mr. Ruto waxa uu waalidkiis ka baryay in ay siiyaan taako yar oo dhulkooda ah si uu galley ugu beero, ayay saaxiibbadiisii yiraahdeen. Waxa uu iibiyey digaag si uu lacag u helo ka dib markii uu dhammeeyey dugsiga sare.
Intii uu ku jiray tartanka madaxtinimada, Mr. Ruto waxa uu taabtay sheekadan dambe, isaga oo isu soo bandhigay in uu yahay mid ka mid ah dadka Kenyaanka ah ee saboolnimada ku dhashay.
Dabayaaqadii sideetamaadkii, Mr. Ruto waxa uu u baxay in uu cilmiga dhirta iyo xayawaanka ka barto Jaamacadda Nairobi. Saaxiibadii waxay sheegeen inay bilaabeen inay ogaadaan inuu diiradda saarayo siyaasadda.
Sannadkii 1997-kii u tartamay Kursiga Baarlamanka ee Deegaanka Eldoret isagoo la tartamayay siyaasi awood badan ku lahaa xisbigii talada hayay, balse Ruto oo sameeyay olole ay ka caawinayeen asxaabtiisa ayaa ku guuleystay kursigaasi.
Marka laga soot ago Dhammaan guulaha siyaasadeed ee Mr. Ruto, tuulada uu ka soo jeedo ayaa weli ah mid aan horumarin in ka badan rubuc qarni ka dib markii uu ku biiray dawladda.
Qaar badan oo ka mid ah ardaydii ay isku fasalka ahaayeen Mr. Ruto ayaa rajaynaya in guushiisu ay keento isbedel.
