Baarlamaanka Puntland Oo Maanta Ansixiyay Miisaaniyadda Sanadka 2022

99

Xildhibaanada Baarlamaanka dowlad Goboleedka Puntland ayaa Maanta oo sabti ah waxaa ay kulankii 12-aad ee Kal-fadhiga 49-aad ku yeesheen Magaalada Garoowe ee Xarunta Gobolka Nugaal ahna Caasimadda Maamulka.

Ajendaha kulanka Baarlamaanka Puntland ayaa waxaa uu ahaa ansixinta Miisaaniyadda Maamulka ee sanadkaan 2022, taasi oo ka kooban $354,093,039, waxaana kulanka goobjoog ahaa 45 Xildhibaan.

Kulanka ayaa waxaa lagu ansixiyay Miisaaniyadda Puntland oo ay soo gudbisay Wasaaradda Maaliyadda Puntland, waxaana u coddeeyay 44 Xildhibaan, iyadoona hal Xildhibaan oo kaliya uu ka aamusay.

Sidoo kale, Baarlamanka dowlad Puntland ayaa loo qeybiyay wax-ka beddelka Xeerka Rugta Ganacsiga, waxaana la fasaxay Xildhibaanada mudda todobaad ah, si ay u soo Akhriyaan wax-ka beddelka Xeerka.

Ugu dambeyn Guddoonka Baarlamaanka Puntland oo soo xiray kulankii Maanta ka qabsoomay Magaalada Garoowe ayaa sheegay in fadhiga la isu’gu imaan doono maalinta Sabtida ah ee todobaadka soo socda.

Golaha Wasiirada dowlad Goboleedka Puntland ayaa maalmo kahor ansixiyey Miisaaniyadda Maamulka ee sanadkaan 2022 oo ka kooban $354,093,039, taas oo ay gudbisay Wasaaradda Maaliyadda Maamulkaas.