Xiisad aad u adag oo u dhaxeyso maleeshiyada Al-shabaab ee gabalkooda sii dhacaya iyo odayaasha dhaqanka beelaha dega degmada Ceelbuur ee gobolka Galguduud ayaa ka taagan gobolkaas.
Xiisaddan ayaa cirka isku sii shareertay markii Khawaarijta Al-shabaab siyaabo kala duwan ay isugu dhaceen qabaa’ilada dega bariga gobolka Galguduud gaar ahaan degmada Ceelbuur, iyadoo xiisadda koowaad ay ka soo bilaabatay deegaanka Wabxo, halkaas oo dhallinyaro deegaanka oo ka carooday fal gacan qaad ah oo mid ka mid ah maleeshiyada Khawaarijta Al-shabaab uu u geystay gabar maqaayad ku iibineysay gudaha Wabxo.
Dhallinyarada ka carootay falkaas gacan qaadka ah oo saddex ahaa,islamarkaana maqaayadda ku sugnaa ayaa garaacis nafta ku dhaafsiiyay arxan-laawihii ka tirsanaa Khawaarijta Al-shabaab,iyadoo markaas ka dib, dhallinyarada Khawaarijta ee saddexda ah u soo qafaasheen degmada Ceelbuur.
Khawaarijtu, waxay go’aamiyeen in saddexda Dhalinyaro ahba la toogto, balse taas waxaa ka biyo diiday odayaasha dhaqanka Ceelbuur oo iyagu is hortaagay inaan dhiiggooda la daadin dhallinyaradan reer wabxo, taas oo keentay in ay isku dhacaan horjoogayaasha Khawaarijta Al-shabaab iyo odayaasha dhaqanka degmada Ceelbuur.
Dhinaca kale, isla odayaasha dhaqanka Ceelbuur iyo horjoogayaasha Khwaarijta Al-shabaab ee ku sugan degmadaas ayaa iyaguna ay xiisad xooggan sidoo kale, soo kala dhex gashay, taas oo ka dhalatay markii odayaal dhaqameedyo diiday in ay bixiyaan lacago baad ah ay Khawaarijtu ku soo rogtay laga soo qafaashay deegaanka Garable isla gobolka Galguduud ka tirsan.
Falkaas odayaasha reer Garable lagu soo qafaashay waxaa hoggaaminayo oo Ceelbuur ku soo xiray odayaasha dhaqanka horjooge Macallin Salaad Gabeyre oo ka soo jeeda isla deegaanka Garable, isagoo markii odayaal ka yimid deegaanka Ceel-garas oo Ceelbuur ugu yimidna uu si cad uga diiday inuu soo daayo odayaashaas adeeradiisa ah ee uu ka soo qafaashay deegaankaas.
Odayaasha dhaqanka ayaa dhankooda si cad uga biyo diiday in ay bixiyaan lacagtaas baadda ah ee Khawaarijta Al-shabaab ku soo rogeen odayaasha ugu xiran ceelbuur, waxayna odayaasha ku hanjabeen in ay dili doonaan wiilkooda ka falaagoobay ee horjooge Macallin Salaad Gabeyre.
Tani, waxay sii xoojisay Khilaafka horjoogayaasha Khawaarijta gabalkooda sii dhacaya ee Al-shabaab kala dhaxeeya dadka degan bariga gobolka Galguduud,iyadoo xiisaddanina ay gaartay meel aad u sareysa maaddaama horjoogayaasha ku jira Khawaarijta ee ka soo kala jeeda labada beel ee deegaankaas dega aanay dooneyn in laga hor yimaado amaradooda, taas oo keentay in dhexdooda isgaad-gaad ka bilowdo.
Odayaasha dhaqanka ee degmada Ceelbuur ayaa ahayn odayaashii ugu horeeyay ee si toos isaga hor yimaadaan maleeshiyaadka Al-shabaab, waxaana sidan oo kale, Al-shabaab uga hor yimid odayaasha dhaqanka gobolka Hiiraan, iyadoo Khilaafkaas uu soo dedejiyay cimriga joogitaanka Al-shabaab ee gobolkaas.
