(Barcelona) 27 Maarso 2022. Laacibka kooxda kubadda cagta Barcelona ee Ousmane Dembele ayaa lagu wadaa inuu xagaagan si bilaash ah uga dhaqaaqo kooxdiisa maadaama uu dhammaadka xilli ciyaareedkan dhici doono qandaraaskiisa, waxaana lasoo warinayaa inuu aqbalay ku biirista kooxda Paris Saint-Germain.
Dembele ayaa la filayay inuu Camp Nou ka dhaqaaqo suuqii January ee lasoo dhaafay, balse taasi ma aysan dhicin, waxaana tan iyo markaas uu kaalin lixaad leh ku yeeshay shaxda Macallin Xavi Hernandez isagoo haatan ka mid ah xiddigaha ugu muhiimsan hannaan-ciyaareedkiisa.
Barca ayaa wali isku dayaysa inay qandaraaska u kordhiso 24-sano jirkan, balse wargeyska AS ayaa sheegaya inuu xiddigii hore ee naadiga Borussia Dortmund heshiis horudhac ah la gaaray PSG isla markaana uu xagaagan u dhaqaaqi doono.
Inkastoo uusan weli heshiis rasmi ah la gaarin kooxda reer France, haddana Blaugrana ayaa quus ka joogto inay laacibkan heshiiska u kordhiso taasoo la micno ah inuu bilaash kaga tagi doono garoonka Camp Nou.
