Waxaa Maanta oo khamiis ah lagu wadaa in Xarunta Teendhada Afisyooni ee xeyndaabka Garoonka Aadan Cadde ee Magaalada Muqdisho ka dhacdo doorashada Guddoomiyaha cusub ee Guddiga Xallinta Khilaafaadka doorashooyinka.
Guddiga u xil-saaran qaban-qaabada doorashada xilka Guddoomiyaha Xallinta Khilaafaadka ayaa shalay soo gaba-gabeeyay diiwaan-gelinta Musharaxiinta doonaya inay u tartamaan xilka Guddoomiyaha Guddigaas.
Xubnaha Guddiga ayaa dooran doona Guddoomiyahooda cusub ee hoggaamin doona Guddiga Khilaafaadka, waxaana doorashada Maanta ka dhaceysa Teendhada Afisyooni goobjoog ka noqon doona Mas’uuliyiin kala duwan oo ka tirsan dowladda Federaalka.
Maalmo kahor ayaa waxaa Teendhada Afisyooni ka dhacday doorashada Guddoomiyaha cusub ee Guddiga doorashooyinka heer Federaal, waxaana xilkaas ku guuleystay oo loo doortay Muuse Geelle Yuusuf oo bedelay Guddoomiyihii hore ee Maxamed Xasan Cirro.
