Taliyihii hore ee hay’adda NISA Jeneraal Cabdiraxmaan Maxamed (Tuuryare) ayaa xalay waxaa Ciidamo ka tirsan dowladda Federaalka ay ku rasaaseeyeen Isgoyska Mirinaayada ee degmada Cabdicaiis ee Gobolka Banaadir.
Jeneraal Tuuryare oo warbaahinta la hadlay ayaa waxaa uu sheegay in rasaas lagu furay gaari uu la socday isaga iyo ilaaladiisa, xili ay marayeen Isgoyska Mirinaayada, isla markaana aysan wax dhibaato ah kasoo gaarin falkaas.
Waxaa uu tilmaamay Taliyihii hore ee hay’adda NISA in Ciidamada rasaaseeyay aysan aheyn kuwii degmada Cabdicaiis ka shaqeyn jiray oo ay ahaayeen Ciidamo cusub oo xalay goobtaas la geeyay, kuwaas oo lagu magacaabo Duufaan.
Tuuryare ayaa Carabka ku dhuftay in rasaastaasi ay aheyd daandaansi si ula kac ah loo sameeyay, isagoo xusay in isku day dil uu ahaa falkaasi, isla markaana uu la tashiyo la sameyn doono Saraakiisha Ciidamada.
Ugu dambeyn Taliyihii hore ee hay’adda NISA Jeneral Cabdiraxmaan Maxamed (Tuuryare) ayaa caddeeyay in Guddi loo saari doono dhacdadaas lagana jawaabi doono haddii aan laga jawaabin sababta keentay in gaarigiisa oo la yaqaano in la rasaaseeyo.
