Ciidamada Daraawiishta Dowladda Jubbaland gaar ahaan guutada labaad ee ka howlgasha deegaanka Janaa Cabdalle iyo tuulooyinka hoos yimaada ayaa saacadihii lasoo dhaafay howlgal qorsheysan ka sameeyay Cag-libaax, Libaaxley iyo Dalnaje oo dhamaantood ay ku dhuumaaleysanayeen Khawaarijta.
Gaashaanle Sare Maxamuud Cabdi Ciilmooge (Fanax) oo ah Taliyaha guutada labaad ee Daraawiishta Jubbaland oo hogaaminayay howlgalkii lagu bur-buriyay fariisimihii Khawaarijta ay ku lahaayeen deegaanada howlgalku uu ka dhacay ayaa warbaahinta Dowladda u sheegay in ay hayeen xogta Argagixisada, taaso ugu dambeen uu sheegay in lagu qaaday howlgal guuleystay.
Sida uu Taliyaha ino xaqiijiyay khasaaro kala duwan ayaa Argagxisada la gaarsiiyay waxaana ciidamada Daraawiishta Jubbaland u suuragashay in dhul baaxad ahaan aad u weyn ay ka sifeeyaan maleeshiyaadka arxanka daran.
Ciidamada Daraawiishta Jubbaland ayaa bilihii ina dhaafay xoojiyay howlgalada ka dhanka ah Khawaarijta, waxaana isku furmay deegaano badan oo horay u kala xirnaa balse hadda laga kiciyay Khawaarijta.
