Munaasabad lagu soo xirayay howlaha xajka ee sanadka 1444-H/ 2023 ayaa lagu qabtay magaalada Makka ee dalka Sacuudi carabiya, taas oo ay ka qeyb galeen Wasiirka Wasaaradda Awqaafta XFS, Agaasimaha guud, madaxda xafiiska arrimaha Xajka, mas’uuliyiinta Qunsuliyadda guud ee Jiddah, Mas’uuliyiinta Xamladaha ee Shirkadaha adeegga Xajka, Shirkadda Diyaaradda Daalo iyo marti sharaf kale.
Xaaji Maxamuud Cibaar, guddoomiyaha xamlooyinka ayaa shacabka Soomaaliyeed ugu cudur daaray caqabadihii dhanka Basaska ee qabsaday Xujeyda, isagoo xusay in lacagahii dib loogu soo celiyay shirkadihii gudan waayay waajibaadkooda.
Wasiirka Wasaaradda Awqaafta iyo Arriimaha Diinta, Muqtaar Rooboow Cali ayaa sheegay in lacagtii laga soo celiyay Basaska ay ku jirto gacan aamin ah, mas’uuliyiinta dowladduna ay la socdaan, isagoo u mahad celiyay dowladda Sacuudiya oo arrintaasi door weyn ka qaadatay.
