(Manchester) 27 Maarso 2022. Wararka ka imaanaya dalka Spain ayaa sheegaya inay kooxda kubadda cagta Manchester City qorsheyneyso inay dagaal suuqa ah la gasho kooxaha Barcelona iyo Liverpool oo ay dooneyso inay kula hardanto saxiixa xiddiga Leeds United ee Raphinha.
Laacibka garabka ka ciyaara ayaa qaab-ciyaareed heer sare ah ku jira xilli ciyaareedkan isagoo sagaal u dhaliyay Leeds 27 kulan oo uu Premier League u ciyaaray, waxaana bandhiggiisa uu kusoo jiitay qaar ka mid ah kooxaha ugu waaweyn qaaradda Yurub.
Wargeyska Sport ee kasoo baxa dalka Spain ayaa sheegay inay Man City xiiseyneyso saxiixa Raphinha isla markaana ay dooneyso inay saxiixiisa u dhaqaaqdo xagaagan xilli la fahansan yahay inay kooxdiisa dalbaneyso keliya qiimaha heshiiskiisa lagu jebin karo oo ah 62.5 milyan oo gini.
Si walba ha noqotee, 25-sano jirka reer Brazil ayaa lasoo warinayaa inuu isaga doonayo inuu ku biiro naadiga Barca isla markaana uu dhaqaaqo Camp Nou kaddib wada-xaajood ay wakiilladiisa la yeesheen maamulka Blaugrana, balse waxaa caqabad ku ah qandaraaskiisa garoonka Elland Road oo ay labo sano ka harsan yihiin.
