Maareeyaha Guud ee Garoonka Diyaaradaha Caalamiga ah ee Sayid Mohamed Abdulle Hassan (SMAHIA) ee magaalada Kismaayo, Mudane Abdirahman Abshir Hirsi, iyo Taliye Ku-xigeenka Ciidanka AUSSOM ee Qaybta 2-aad (Sector 2), Colonel Daniel Musau, ayaa si wadajir ah u guddoomiyay kulan ka dhacay garoonka, kaas oo diiradda lagu saaray diyaar-garowga, ka hortagga iyo xakamaynta cudurka Ebola.
Kulankan ayaa lagu muujiyay muhiimadda istaraatiijiyadeed ee garoonka diyaaradaha Kismaayo, maadaama uu yahay albaabka ugu muhiimsan ee laga soo galo Jubaland, isla markaana ay isticmaalaan hay’ado, shirkado iyo saaxiibo kala duwan oo ka hawlgala garoonka.
Kulanka waxaa ka soo qayb galay wakiillo ka socday Wasaaradda Caafimaadka Jubaland iyo qaar ka mid ah maamulka garoonka, kuwaas oo ka wada hadlay muhiimadda ay leedahay xoojinta wada-shaqeynta iyo isku-duwidda dadaallada loogu diyaar-garoobayo ka hortagga iyo xakamaynta cudurka Ebola.
Gebagebadii kulanka, waxaa lagu heshiiyay in la dhiso guddi farsamo oo isku-dhafan, kaas oo ka kooban maamulka garoonka, wasaarada caafimaadka Jubaland, saaxiibada AUSSOM iyo Ciidanka Kenya (KDF), iyo saaxiibada kale ee ka hawlgala garoonka. Guddigan ayaa masuul ka noqon doona isku-duwidda iyo la socodka tallaabooyinka ka hortagga iyo xakamaynta cudurka, iyo xoojinta wada-shaqeynta dhammaan dhinacyada ay khusayso.
Kulanka ayaa ku soo dhammaaday jawi wanaagsan oo is-afgarad iyo wada-shaqeyn ku dhisan, iyadoo dhinacyadu ay isla qaateen in la xoojiyo dadaallada wadajirka ah ee lagu ilaalinayo caafimaadka bulshada, laguna xaqiijinayo u-diyaargarowga garoonka ee xaaladaha caafimaad ee degdegga ah.
