Dowladda Uganda oo sheegtay in ay wax ka qabanayso caqabadaha haysta qaxoontiga Soomaaliyeed ee ku nool dalkeeda
Danjiraha Soomaaliya ee Uganda Cali Maxamed Maxamuud ( Cali Cagabaruur ) oo la kulmay Wasiirka Gargaarka, Maareynta Musiibooyinka iyo Qaxootiga Eng Hilary Onek ayaa kala hadlay arrimo badan oo ay ka mid tahay cabaqada haysta qoxootiga Soomaalida ee ku nool dalkan Uganda.
Safiir Soomaliya ayaa la wadaagay wasiirka in ay jiraan caqabado soo wajahay qoxootiga Soomaaliyeed ee ku nool Uganda dhowrkii bilood ee la soo dhaafay sidaa ay muwaadiniin Soomaaliyeed usoo sheegeen safaarada, caqabadahaas oo Soomaalida u gaar ah.
Dhankiisa Wasiirka Gargaarka, Maareynta Musiibooyinka iyo Qaxootiga dowladda Uganda Eng Hilary Onek ayaa sheegay in dhammaan caqabadahaas si deg deg ah wax looga qaban doono, Soomaalidana yihiin dad qiimo badan oo soo dhawayn Uganda ka mudan.
