Inta la xaqiijiyay laba Ruux ayaa geeriyootay 8 kalena waa ay dhaawacmeen kadib Shil Gaari oo xalay ka dhacay degaanka Dila ee hoostaga Magaalada Boorama ee Gobolka Awdal Somalilsnd.
Shilka ayaa waxaa uu ka dambeeyay kadib markii ay isku dhaceen Gaari nooca iska roga ah iyo Gaari Bas ah oo marayay degaanka Dila, waxaana dadka ku dhintay Shilka & ku dhaawacmay la geeyay Isbitaalka Magaalada Boorama.
Ciidamada ilaalada waddooyinka ee taraafikada loo yaqaano iyo dadweyne farabadan ayaa tegay halka shilka uu ka dhacay, iyaga oo gurmad u sameeyay dadkii shilka ku waxyeeloobay, sida ay sheegeen dad Goobjoogayaal ah.
Shilalka Gaari ayaa aad ugu badan jidadka kuyaalla degaannada Somaliland, waxaana darawalada qaarkood ay sheegeen inay ugu wacan tahay waddooyinka qaarkood oo aad u burbursan wallow Xukuumadda Somaliland ay sheegtay inay waxka qaban doonto.
