Puntland Oo Go’aano Adeg Kasoo Saartay Diidmada Lacagta Shilinka

893

Maamulka Puntland ayaa soo saaray go’aano Cusub oo la xiriira diidmada lacagta Shilling Soomaaliga iyo qorshe lagu yareynayo Sicir barar darran oo halkaas ka jira, kadib markii shalay Banaanbax xoogan uu ka dhacay Magaalada Garoowe.

Madaxweynaha Puntland Saciid Cabdullahi Deni ayaa sheegay in lacagta Canshuurta ee Dekadda Magaalada Boosaaso 10% lagu qaadi doono Shilling Soomaaliga, halka 10 iyo wixii kayar aan la isugu diri karin adeega lacagta danabeysan sida SAHAL iyo E-DAHAB.

Waxaa uu sheegay Saciid Deni in Go’aankaas uu yimid kadib markii ay soo jeediyeen Guddigii arrimahaas loo saaray iyo latashiyo badan oo maamulka la sameeyay Ganacsatada iyo dadka kashaqeeya arrimaha sicirka sarifka.

 

Sidoo kale Madaxweynaha Puntland oo ka hadlay banaanbax shalay ka dhacay Garoowe oo dadka ay uga cabanayeen sicir bararka ayaa waxaa uu sheegay in uusan ahayn mid la xiriira diidmada lacagta iyo sarifka balse uu ahaa mid Puntland lagu sumcad dilayo oo ay ka dambeeyeen dad ka faaidaysanaya dareenka bulshada una deegaya dano siyaasadeed.

Hadalka Madaxweynaha Puntland Saciid Cabdullaahi Deni ayaa waxaa uu kusoo aadayaa xilli maalmihii la soo dhaafay isticmaalka lacagta Shillinka Soomaaliga laga diiday degaannada Puntland, isla markaana Bulshada ay cabasho ka muujiyeen.